Logo

अध्यक्षको लोभमा ओली समूह गएका बाराका सांसदले माफी माग्दै पुनः प्रचण्ड–नेपाल समूहमै



वीरगञ्ज, माघ २५ गते । प्रतिनिधिसभा विघटन हुँदा नेकपा दुई समूहमा विभाजन भएपछि जिल्ला तहमा कुन समूहमा बस्ने र राजनीति गर्ने भन्ने विषयमा अलमल देखिएको छ । उनीहरु कहिले ओली समूहतिर पुगेका छन् त कहिले प्रचण्ड– नेपाल समूहमा फर्किने गरेका छन् ।

यस्तैमा नेकपा बाराका जिल्ला सचिव तथा प्रदेश २ का सांसद सुन्दर विश्वकर्माको पनि ढुलमुले प्रवृत्ति बाहिरिएको छ ।

तीन दिनअघि उनी जिल्ला अध्यक्षको लोभमा ओली समूहको नेकपामा गएको बाराका नेकपाको राजनीतिमा चर्चा चुलिएको थियो । तर, दुई दिन नबित्दै उनी फेरी पुरानै खेमामा फर्केको सामाजिक सञ्जाल फेसबुकमार्फत आफैले दाबी गरेका छन् ।

ओली पक्षतिर जिल्ला अध्यक्ष पद पाउने आश्वासनमा लागेपनि विश्वकर्माले अध्यक्ष पद पाउने अवस्था नदेखिएपछि पुनः प्रचण्ड–माधवतिरै फर्केका हुन् ।

त्यसो त उनले आफू ओली समूहमा गएकोमा माफी समेत मागेका छन् ।

‘नेकपा दुई समूहमा विभाजित हुँदा दुःख व्यक्त गर्दै दुबै तिर आफ्नै प्रिय कमरेडहरु छन्, कता लागौ भन्ने निर्णय गर्न कठिन भयो, केही समय मन अस्थिर रह्यो, आखिर आज पार्टीको मुलधार माधव–प्रचण्ड समूहमै रही सक्रिय हुने निर्णय गरेको छु, मेरो कारणले आदरणीय नेता, कार्यकर्ता, समर्थक, शुभचिन्तक कमरेडहरुमा पर्न गएको अन्यौलताप्रति आत्मालोचित हुँदै क्षमा चाहन्छु’, भन्दै उनले माफी मागे ।

तीन दिनअगाडि विश्वकर्मा नेकपा प्रदेश नम्बर २ का ईन्चार्ज तथा प्रमुख सत्यनारायण मण्डल, केन्द्रीय कार्यालय सचिव ईश्वरी रिजाल र नेकपा केन्द्रीय सदस्य बद्रीप्रसाद भट्टराईको उपस्थितिमा ओली पक्षतिर समावेश भएका थिए ।

फेसबुक बाट आफनो प्रतिक्रिया दिनुहोस...