रौतहट, ३२ जेठ । सरकारले लकडाउनलाई खुकुलो पारे पनि चार जिल्लामा भने ‘पूर्ण लकडाउन’ यथावत् रहने भएको छ। स्वास्थ्य मन्त्रालयले जारी गरेको नयाँ मापदण्ड अनुसार २ सय बढी ‘एक्टिभ’ संक्रमण भएको जिल्लामा ‘पूर्ण लकडाउन’ गर्ने भनिएको छ।

सोही अनुसार सर्लाही, रौतहट र कपिलवस्तु र दैलेखमा लकडाउन जारी हुने भएको हो। यी चार वटै जिल्लामा ‘एक्टिभ’ संक्रमण संख्या २ सय बढी छ। सर्लाहीमा ४७१, रौतहटमा ५१६, कपिलवस्तुमा ३५३, र दैलेखमा ४४३ जना संक्रमित छन्।

कपिलवस्तुका प्रमुख जिल्ला अधिकारी दीर्घनारायण पौडेलले सरकारको निर्देशन आउनसाथ लकडाउन लागू गर्ने जनाए। ‘हामीलाई यसबारे लिखित जानकारी आएको छैन। त्यस्तो आउनसाथ तुरून्त लकडाउन जारी गर्छौं,’ उनले भने।

रौतहटका प्रमुख जिल्ला अधिकारी बासुदेव घिमिरले पनि मन्त्रालयको मापदण्डबारे भोलि छलफल गरेर अगाडि बढ्ने बताए। दैलेखका सहायक प्रमुख जिल्ला अधिकारी इन्द्रबहादुर क्षेत्रीले पनि लकडान अहिले पनि जारी रहेको भन्दै अब नयाँ मापदण्ड अनुसार पनि कायम रहने बताए।

उनका अनुसार अहिले जिल्लामा बिहान ५ बजेदेखि ८ बजे खाद्य तथा तरकारी पसल खोल्न दिइएको छ। त्यस्तै, पट्रोलियन ढुवानी र फोहोरमैलाको कामलाई पनि रोकिएको छैन। यसका साथै, बैंक तथा वित्तीय संस्थाललाई दिन बिराएर खोल्न दिइएको छ। यसबाहेक सबै पसल बन्द गरिएको र त्यो कायम रहने क्षेत्रीले बताए।

दैलेखमा कर्णाली प्रदेशभरमै सबभन्दा बढी संक्रमित छन्। जसमा एक जना मृत्यु समेत भएको छ। स्वास्थ्य मन्त्रालयका प्रवक्ता डा. जागेश्वर गौतमले २ सय बढी ‘एक्टिभ’ संक्रमित रहेका जिल्लामा अर्को मापदण्ड जारी नभइन्जेल लकडाउन पहिलेकै अवस्थामा लागू हुने बताए।

झण्डै तीन महिनापछि लकडाउनलाई पहिलो चरणमा खुकुलो गरिएसँगै मन्त्रालयले संक्रमण जोखिमलाई लक्षित गर्दै नयाँ मापदण्ड जारी गरेको हो। साभार setopati.com बाट

LEAVE A REPLY

Please enter your comment!
Please enter your name here